|
|
| |
|
 |
| |
|
|
Gant re C’hlas Breizh eo bet sinet Ya d’ar brezhoneg
Ar strollad politikel kentañ a sin an emglev eo hini re C’hlas Breizh. D’ar Gwener 19 a viz Gwengolo, e Roazhon, ez eus bet roet lañs d’un diorren « padus » evit ar brezhoneg eta.
Dirak an Ao. Michel Rolland, sekretour rannvroel re C’hlas Breizh, an It. Cécile Duflot, sekretourez vroadel ar re C’hlas, an Ao. François de Rugy, kannad Glas evit Naoned hag an It. Lena Louarn, prezidantez Ofis ar Brezhoneg, eo bet sinet, ez-ofisiel, an emglev Ya d’ar brezhoneg. Divizet en deus ar strollad implijout ar brezhoneg hag e lakaat war wel bep tro ma vo tu en e vont-en-dro diabarzh ha diavaez.
Divyezhek e teuio da vezañ tamm-ha-tamm al lec’hienn genrouedad, an teulioù brudañ, ar paper-lizher, ar responterez, ar c’hartoñsoù-pediñ, panellerezh ar burevioù, pennad-stur ar gazetenn ha luganoù ar strollad.
Stummadurioù evit deskiñ ar yezh a vo kinniget d’an implijidi a-hend-all.
Roet e vo dorn gant re C’hlas Breizh d’ar c’humunioù ha d’ar C’humuniezhioù kumunioù o deus sinet ar garta Ya d’ar brezhoneg c’hoazh ha ganto e vo broudet ar c’humunioù n’o deus ket sinet d’en ober.
Er frammoù int ezel anezho e vo kinniget bep tro divyezhekaat teulioù brudañ an ekologiezh keodedel.
|
|
|
|
