Unan eus ar chanterioù pouezusañ evit suraat amzer da zont ar yezh eo ar c’helenn. Rak-se e labour an Ofis Publik da frammañ ha da ziorren ar modoù da dreuzkas ar yezh er skol hag a-raok ar skol.
Tost 30.000 a dud a zesk brezhoneg hiziv : ouzhpenn 14.000 en hentadoù divyezhek, 8000 gant an tañva er 1añ derez, e-tro 5000 er skolajoù hag el liseoù, 3000 oadour bennak er c’hentelioù-noz ha 700 studier en deskadurezh-uhel. Kelennet ha treuzkaset e vez ar brezhoneg eus ar vugaligoù er magourioù betek an dud deuet a heuilh stummadurioù dibaouez. Diorren kalz a ra bed ar c'helenn ha postoù labour nevez a vez krouet bep bloaz evit se.
Evel an holl gelennerien all e rank ar gelennerien divyezhek bezañ tapet ur Master evit gallout lakaat o anv er genstrivadeg da vont da gelenner.
Mat eo gouzout ez eus Masterioù arbennikaet war ar c’helenn divyezhek e ESSM Breizh evit ar publik, e Kelenn evit Diwan hag en EUSGeK evit ar prevez.
Ar re zo ur Master ganto (pe a zo enskrivet e Master 2) a c’hall lakaat o anv er genstrivadeg a-ratozh evit an hentadoù divyezhek er 1añ derez ; evit an eil derez ez eus ur genstrivadeg CAPES brezhoneg (CAFEP evit ar prevez).
Bep bloaz e vez divizet gant kelennerien ditlet tremen eus an hentadoù unyezhek d’an hentadoù divyezhek. O skiant-prenet zo talvoudus-tre hag evito ez eo un doare da reiñ startijenn d’o red-micher en-dro goude meur a vloavezh kelenn en ur yezh nemetken.
Meur a zoare zo da dremen d’an divyezhegezh :
- Ma ouzit brezhoneg dija e c’hallit lakaat ho parregezhioù yezh da vezañ anavezet dre an Ensellerien. Gallout a rit tremen un diplom-Stad ivez, an Diplom Barregezh war ar Yezh (DBY) da c’houzout resisoc'h peseurt live brezhoneg hoc'h eus, hervez framm dave boutin Europa.
- Ma ne gomzit ket brezhoneg ez eus tu da vezañ stummet war ar yezh dre ar stummadur micherel : efedus-tre eo evit deskiñ ar yezh en ur ober 6 miz ha mont pelloc’h diouzh an dro dre ur stummadur uhel war 3 miz. Koust ar stummadurioù-se a c’hell bezañ kemeret e karg gant hoc’h implijer evit darn ha sikourioù arc’hant a c’hellit kaout mod all.
“Skoazell” zo ur yalc’had roet gant Kuzul-Rannvro Breizh da skoazellañ ar re a laka o anv en ur Master “Deskadurezh divyezhek”. E-pad 2 vloaz ar Master ez eus tu da gaout ur sikour 10.000 euro (5000 e M1 ha 5000 e M2 neuze). En eskemm d'ar sikour-se e rankot lakaat hoc’h anv da dremen d’ar genstrivadeg hag ur wezh tapet anezhi e kelennot en ur skol divyezhek e-pad 5 bloaz da nebeutañ.
“Desk/Kelenn” zo ur mod all da vezañ skoazellet. Yalc’hadoù eo evit an danvez kelennerien a heuilh ur stummadur (rakvicherel pe vicherel) ha d’ar gelennerien a ya da heuliañ stajoù gwellaat ar yezh. Betek 3000 euro a c’hall bezañ roet gant Kuzul-rannvro Breizh, kuzul-departamant Penn-ar-Bed hag hini ar Mor-Bihan. Evit lakaat hoc’h anv, kit e darempred gant an Ofis Publik.
|
