|
Kinnig a ra an Ofis Publik dafar yezhel dave d'an
holl evit netra. TermOfis, ur bank termenoù,
KerOfis, un diaz diwar-benn anvioù-lec'h ar vro,
hag ar c'hentañ troer emgefre brezhoneg-galleg.
Bemdez e pinvidika skipailhoù an Ofis Publik
ar bankoù titouroù hag ar binvioù
kinniget gantañ.
Kinnig a ra TermOfis, bank roadennoù TermBret,
anezhañ kreizenn dermenadurezh an Ofis Publik,
termenoù teknikel eus ar vuhez a-vremañ.
An termenoù-se, alies, ne gaver ket anezho er
geriadurioù yezh boutin. TermOfis hag
a c'haller atersiñ enlinenn abaoe miz Meurzh
2006 en deus graet berzh bras peogwir e vez goulennataet
ur wezh bep 4 munut, noz-deiz, a-hed ar bloaz. Talvoudus
eo TermOfis evit an divrezhonegerien a fell dezho
gouzout petra a dalvez termen pe dermen ha ken talvoudus
all eo evit ar vrezhonegerien a fell dezho pinvidikaat
o zamm geriaoueg pe o deus ezhomm skoazell a-benn
kas da benn labourioù treiñ e brezhoneg.
Divizet an Ofis Publik digeriñ d'an dud e vank
titouroù lec'hanvadurel, KerOfis. KerOfis
emeur ouzh e sevel abaoe ar bloavezhioù 1990.
Diwarnañ eo diazezet al labourioù a gas
an Ofis Publik da benn evit kinnig ur skritur reishoc'h
d'an anvioù-lec'h brezhonek. E KerOfis
e vo kavet titouroù diwar-benn lec'hiadur
pep anv ha titouroù istorel ivez. Lec'hioù
zo, ouzhpenn, a vo kavet ivez displegadurioù
etimologel evito pa'z int bet studiet ganeomp diwar
goulenn ar strollegezhioù hon eus labouret evito.
Ur bank titouroù hep e bar eo KerOfis.
Sur-mat e plijo d'an holl frioù-furch nay gant
hon anvioù-lec'h, ha bez' ez eus anezho evel
ma oar an holl. Servijout a raio d'an ensklaskerien
ha d'an holl re a fell dezho skrivañ o chomlec'h
e brezhoneg ivez.
Kemer a ra perzh Ofis Publik ar Brezhoneg er raktres
europat Apertium kaset war-raok gant skol-veur
Alacant er Broioù Valencia, e Spagn. A-drugarez
d'ar c'henlabour-se hon eus gallet sevel ar c'hentañ
troer emgefre brezhoneg-galleg. Embannet eo bet
ar stumm 0.1 e miz Mae 2009 ha kenderc'hel a reer d'e
wellaat ha d'e glokaat bemdez. Pep evezhiadenn a vo
deuet mat (gerioù n'int ket anavezet, anvioù
divoutin a vank, reolennoù treuzkas eus an eil
yezh d'eben da wellaat...).
|
|
