|
|
|
|
|
|
|
Poc’hêr Kumuniezh a sin a garta Ya d’ar brezhoneg
Degemeret eo bet emezeladur ar 6vet Kumuniezh-kumunioù d’ar garta Ya d’ar brezhoneg gant an Ofis.
An it. Lena Louarn, prezidantez Ofis ar Brezhoneg ha besprezidantez ar Rannvro karget eus yezhoù Breizh a oa aet da Garaez, d’an 18 a viz Mezheven 2010, evit kemer perzh e lid-sinañ ar garta dirak an ao. Christian Troadeg, maer Karaez ha prezidant ar Gumuniezh-kumunioù, an ao. Jean-Michel Le Boulanger, besprezidant ar C'huzul-rannvro hag an it. Annie Le Guen, kuzulierez-kêr Kledenn-Poc’hêr.
Ac’hann da 2 vloaz e ranko ar Gumuniezh kas da benn 13 ober a sell ouzh ar panellerezh divyezhek dreist-holl ha skoroù kehentiñ ar Gumuniezh. Ar gumuniezh-kumunioù a gemero perzh er vrudadeg evit ar c'helenn brezhoneg d'an oadourien ivez ha sinañ a raio ur gevrat kefridi gant an Ofis.
Gourc’hemennoù he deus degaset an it. Lena Louarn da dud ar Gumumiezh evit ar sinadur-se hag an holl raktresoù evit diorren ar brezhoneg (labour brav a zo graet c’hoazh evit panellerezh ar poull-neuial etrekumunel staliet e Karaez). Sachet he deus an evezh war ar pouezus e oa diorren ar c’helenn divyezhek war diriad ar Gumuniezh. D’an deiz a hiziv n’eus nemet kumun Karaez a ginnig hentadoù divyezhek e Poc’hêr Kumuniezh.
|
|
|
|